Ապրիլի 2-ին «Բարձրավոլտ էլեկտրացանցեր» ընկերությունում տեղի է ունեցել հանդիպում՝ ընկերության ղեկավարության, ՏԿԵ նախարարության, ԷԷՀՕ ՓԲԸ-ի, իրանական «Թավանիր» և «Սանիր» ընկերությունների ներկայացուցիչների միջև։ Հանդիպման ընթացքում քննարկվել են «Իրան-Հայաստան 400 կՎ էլեկտրահաղորդման օդային գծի և Նորավան ենթակայանի կառուցում» ծրագրի ընթացքին և առաջնահերթություններին առնչվող հարցերը, ինչպես նաև «Նորավան» ենթակայանից մինչև հայ-իրանական սահման 400 կՎ «Ջուլֆա» և «Հերիս» օդային գծերի կառուցումից հետո դրանք ժամանակավոր՝ 220 կՎ լարման տակ միացնելու վերաբերյալ խնդիրները:
«Բարձրավոլտ էլեկտրացանցեր» ընկերության գլխավոր տնօրեն Դավիթ Միրզոյանը ողջունելով ներկաներին՝ կարևորել է ծրագրի համապետական նշանակությունը էներգետիկ անվտանգության և սպառողների էլեկտրամատակարարման հուսալիության բարձրացման, ինչպես նաև էներգետիկայի բնագավառում տարածաշրջանային փոխշահավետ համագործակցության զարգացման գործում: Քննարկման արդյունքում, կողմերը պայմանավորվել են ձևավորել աշխատանքային խումբ՝ բաղկացած ԲԷՑ ՓԲԸ, «Սանիր» և «Թավանիր» ընկերությունների ներկայացուցիչներից, և երկշաբաթյա պարբերականությամբ, տեսակապի միջոցով, քննարկել առկա խնդիրները, ծրագրի առաջընթացին խոչընդոտող հարցերը։ Պայմանավորվել են նաև 400 կՎ «Ջուլֆա» և «Հերիս» օդային գծերը ժամանակավոր 220 կՎ լարման տակ միացնելու հարցին անդրադառնալ՝ ելնելով ծրագրի կատարողականից ու ավտոտրանսֆորմատորների մատակարարման ժամկետներից:
«Թավանիր» և «Սանիր» ընկերությունների ներկայացուցիչները պատրաստակամություն են հայտնել կրկին հանդիպել՝ ձեռքբերված պայմանավորվածությունները ժամանակին և արդյունավետ իրագործելու նպատակով։
